Sujet 2004: Rezäpt zum Halbmondkin!

 Halbmondclique Frenkendorf

Rezäpt zum Halbmondkin!

Öppis gits wo d Schwyzer chönne

Und niemmer duet en es missgönne.

Kei Samschtig chuum ä Sunntig gits

Oohni Feschtli in der Schwyz!

Und gits per Zuefall eimol keis?

Was sölls? Erfindet me halt eis!

D Feschtli fyyre wie sy falle

dass isch das wo eus duet gfalle!

Nüt isch lyychter z'arrangierä

als e Grund zum jubilierä:

Ob Bundesfyr wo dr Nationalstolz blüeht

mit Füürwärk wo am Himmel glüeht.

Wiehnacht, Silveschter oder d'Oschtere

neu au s'Geburtstagsfescht bi dä Nochberä.

Öb ä Raegge-Night mit Ramba-Zamba

oder d'Unterwöschparty nur im Tanga.

Mit dr Figur im Bikini an dr Poolparty brillierà

oder s'Summernachtsfescht wo me duet grillierä.

Hochzyt, Pensionierig, Geburtstag - und - und - und...

wie gseit, zum jubiliere findet sich immer ä Grund.

Öppis fyyrt me jetzt s'isch scho bald Tradition

in dr ganze Schwyz nid nur in dr Region.

Trick or Treat heisst: Süessigkeite oder Schtreich

das isch Inn, im Trend und gar kei Seich!

An däm Daag luegsch erstuhnt us em Fänschter

gsehsch uf dr Schtrooss uss, Häxe und Gschpängschter.

S het sich etabliert, s'isch nümm nur ä Splyyn

es sind d'Chinder verchleidet an Halloween!

Jedes duet baschtle, näie und kreirä

will wichtig am Bruuch isch s'Kostümiere!

Halloween hett mit eus Naare vill Gmeinsamkeite,

sich nämmlich uff so nä Bruuch guet vorzbereite.

Monschter, Draculas und gruseligi Geischter

Frankensteins oder sogar Häxemeischter.

Aber grad so eifach hei's mir Naare nid,

will's für eus no anders wichtigs git!

Me sammlet Ideeä duet's Wältgscheh betrachte

S'passiert gnueg, muesch Detail beachte

d'Ideeà sy gsammlet sy wärde klassiert

und für à Sujet rezeptiert.

Es Rezäpt wie bim koche gis ä keis

und doch bruuchts für jedes Sujet eis.

Ä Mischig bruuchts das Sujet läbt

au mir hei do e'guets Rezäpt!

Als Grundschtoff ä Thema, so richtig heiss

es Ereignis wo ebä jedä weiss.

Ä Schuss vom Dorf nur ganz ä chlyne

für das nimmsch ä Teil vom Wappe yhnä.

Verteilsch ä pryse vom traditionellä

und rührsch das mit dr grosse Chellä.

E chli Würzä mit Witz es wär jo schaad

mir wei jo das farblich, nit eso faad,

s'Ganze in Ofe mit Gags überbacke

e soo düen mir es Sujet mache.

Isch das Rezäpt denn fertig kreiert

chunnt dr Zytpunkt wo me's probiert.

D'Zuetate suechsch in alte Klamotte

s'eint oder s'ander isch am verrotte

secklisch in d'Läde, goschs go chaufe,

für alle Zuetate duesch mänglisch laufe.

Villicht dervo no öppis bschtelle?

Wenn alles hesch dueschs zämmeschtelle.

Hett me denn ändlich s'richtigä gfunde

gits arbetsrychi Vorfasnachts-Schtunde.

Mir sy sowyt jetzt wird kocht und grüehrt

und Euch s'neue Sujet präsentiert!

Der Grundschtoff in Topf und umärueühre

will mir wei au einisch jubiliere!

Geburtstag fyyre und erscht no rund

40 Joohr Halbmond isch eusä Grund!

Usem Dorf ä Schuss vom Wappe in Topf,

als Larve träge mir dr Mond uf em Chopf!

Öppis traditionells muess no in Topf derzue?

Hejo! "dr Harlekin" chönnt mäh ihnä due!

No würze dass äs farbigs Bouget git,

us däm Grund laufe mir blau - silbrig mit!

Ganz zum Schluss in Ofe zum gaare

Mmh... fein isch Sujet für eus Naare.

Es isch aagrichtet und mir wei jetzt brilliere

und Euch das Menü "Sujet 04" serviere.

"Y'stoh marsch" s'Jubiläum isch cho

mir stönd im neue Halbmondkin do!

Das isch dr Sujet 2004 Bricht - Do goht's zrugg zur Übersicht